నంద‌మూరి బాల‌కృష్ణ హీరోగా నటిస్తున్న తాజా చిత్రం ‘భగవంత్ కేసరి’. ఎన్‌బీకే 108గా వస్తున్న ఈ చిత్రానికి అనిల్ రావిపూడి దర్శకత్వం వహిస్తున్నాడు. అక్టోబ‌ర్ 19న ప్రేక్ష‌కుల ముందుకు రానుంది. ఇప్ప‌టికే ఈ సినిమా నుంచి వ‌చ్చిన ఫస్ట్ లుక్‌ పోస్టర్‌తో పాటు టీజ‌ర్‌ నెట్టింట హల్‌ చల్‌ చేస్తూ.. ఫ్యాన్స్ లో జోష్ నింపుతున్నాయి. ఇదిలా ఉంటే.. తాజాగా ఈ సినిమా ట్రైలర్ లాంచ్ ఈవెంట్‌కు సంబంధించి మేక‌ర్స్ సాలిడ్ అప్‌డేట్ ఇచ్చారు.
ఈ సినిమా ట్రైలర్ లాంచ్ ఈవెంట్‌ను హన్మకొండలోని యూనివర్సిటీ ఆఫ్ ఆర్ట్స్‌ అండ్ సైన్స్‌ కాలేజీలో నిర్వహించనున్నట్టు మేక‌ర్స్ ప్ర‌క‌టించిన సంగ‌తి తెలిసిందే. అయితే ఈ ట్రైలర్ లాంఛ్ ఈవెంట్‌కు వాల్తేరు వీరయ్య ఫేమ్ K. S. రవీంద్ర (అలియాస్ బాబీ కొల్లి), వీర సింహా రెడ్డి ఫేమ్ గోపీచంద్ మలినేని లు స్పెషల్ గెస్ట్‌లుగా వ‌స్తున్న‌ట్లు చిత్ర‌యూనిట్ ప్ర‌క‌టించారు. ఇక ఈ సినిమా ట్రైల‌ర్‌ను రాత్రి 8:16 గంట‌ల‌కు విడుద‌ల చేయ‌నున్నారు.
మాస్‌ యాక్షన్‌ ఎంటర్‌టైనర్‌గా వస్తున్న ఈ మూవీలో కాజల్ అగర్వాల్‌ హీరోయిన్‌గా నటిస్తుండగా పెళ్లి సందడి ఫేం శ్రీలీల కీలక పాత్ర పోషిస్తోంది. షైన్‌ స్క్రీన్స్‌ పతాకంపై సాహు గారపాటి, హరీష్‌ పెద్ది నిర్మిస్తున్నారు. బాలీవుడ్ న‌టుడు అర్జున్‌ రాంపాల్‌తో పాటు తదితరులు నటిస్తున్నారు.
