యంగ్‌ రెబల్‌స్టార్‌ ప్రభాస్‌ సినిమా అప్‌డేట్‌ కోసం ఇన్నాళ్లు అభిమానులు ఎంతగానో ఎదురుచూశారు. ‘ప్రభాస్‌ 20వ సినిమా అప్‌డేట్‌ కావాలంటూ సోషల్‌మీడియాలో హంగామా చేశారు. కాగా ఎట్టకేలకు ‘సాహో’ తర్వాత ఆయన సినిమా అప్‌డేట్‌ విడుదలైంది. ఈ వారంలో హైదరాబాద్‌లోని అన్నపూర్ణ స్టూడియోస్‌లో సినిమా కొత్త షెడ్యూల్‌ ప్రారంభం కాబోతోందని చిత్ర బృందం పేర్కొంది. దీంతో అభిమానులు ఆనందం వ్యక్తం చేశారు. ‘నమ్మొచ్చా గురువు గారూ..’ అంటూ సరదా కామెంట్లు చేశారు.
ఎస్‌. రాధాకృష్ణ ఈ సినిమాకు దర్శకత్వం వహిస్తున్నారు. ప్రేమకథగా రూపొందుతున్న ఈ సినిమాలో పూజా హెగ్డే హీరోయిన్‌ పాత్ర పోషిస్తున్నారు. ఈ చిత్రానికి ‘జాన్‌’ అనే టైటిల్‌ ప్రచారంలో ఉంది. ఈ సినిమా షూటింగ్‌ వాయిదా పడిందని ఇటీవల ప్రచారం జరిగింది.
