వినూత్నంగా ‘ఆకాశం నీ హద్దురా’ పాటను విడుదల చేసిన సూర్య


తమిళ స్టార్ సూర్య హీరోగా నటిస్తున్న చిత్రం ‘సూరరై పోట్రు’. తెలుగులో ఈ సినిమాని ‘ఆకాశం నీ హద్దురా’ టైటిల్‌తో విడుదల చేస్తున్నారు. ‘గురు’ ఫేమ్ సుధ కొంగర ఈ సినిమాకు దర్శకత్వం వహిస్తున్నారు. జీవీ ప్రకాష్ కుమార్ సంగీతం సమకూరుస్తున్నారు. 2డి ఎంటర్‌టైన్మెంట్, సిఖ్యా ఎంటర్‌టైన్మెంట్ బ్యానర్లపై సూర్య ఈ చిత్రాన్ని నిర్మిస్తున్నారు. రాజశేఖర్ కర్పూరసుందర పాండియన్, గునీత్ మోంగా, ఆలిఫ్ సుర్తి సహ నిర్మాతలు. ఎయిర్ డెక్కన్ వ్యవస్థాపకుడు జీఆర్ గోపినాథ్ జీవిత కథ ఆధారంగా ఈ సినిమాను తెరకెక్కిస్తున్నారు.

‘ఆకాశం నీ హద్దురా’ సినిమాలోని రెండో పాట ‘పిల్ల పులి’ ప్రోమో వీడియోను గురువారం మధ్యాహ్నం 3 గంటలకు విడుదల చేశారు. అయితే, ఈ సాంగ్ లాంచింగ్ ఈవెంట్ చరిత్రలో నిలిచిపోయే రీతిలో చేశారు. ఆకాశం నడి మధ్యలో పాటను విడుదల చేశారు. ఈ విమానం లాంచింగ్ ఈవెంట్‌లో స్పైస్‌జెట్ చైర్మన్ అజయ్ సింగ్, సూర్య తండ్రి శివకుమార్, మోహన్ బాబు తదితరులు పాల్గొన్నారు.

‘పిల్ల పులి’ ప్రోమో సాంగ్‌ను ఆకాశంలో లాంచ్ చేయడానికి ‘సూరరై పోట్రు’ బ్రాండింగ్‌తో ఉన్న స్పైస్‌జెట్ బోయింగ్ విమానంలో 100 మందిని తీసుకెళ్లారు. వీరంతా తొలిసారి విమానం ఎక్కినవారే. వీరితో పాటు ‘ఆకాశం నీ హద్దురా’ చిత్ర యూనిట్ బోయింగ్ విమానంలో వెళ్లి ఆకాశంలో ఉండగా పాట ప్రోమోను లాంచ్ చేశారు. వీరిలో 70 మంది పేద విద్యార్థులు ఉన్నారు. వీరంతా సూర్య నడిపిస్తోన్న అగరం ఫౌండేషన్‌లో చదువుతోన్న విద్యార్థులు. తమ తల్లిదండ్రులతో కలిసి ఈ విద్యార్థులంతా తొలిసారి విమానం ఎక్కారు.