అక్కినేని అమల నటించిన తాజా బాలీవుడ్ మూవీ ‘తుమ్ సే నా హో పయేగా’. పాతాల్ లోక్, మేడ్ ఇన్ హెవెన్, రాకెట్ బాయ్స్ వంటి చిత్రాల‌తో గుర్తింపు తెచ్చుకున్న ఇష్వాక్ సింగ్ ఈ సినిమాలో హీరోగా న‌టిస్తున్నాడు. ఇప్ప‌టికే ఈ సినిమా నుంచి విడుద‌ల చేసిన ఫ‌స్ట్ లుక్‌తో పాటు టీజ‌ర్ ప్రేక్ష‌కుల‌ను విప‌రీతంగా ఆక‌ట్టుకుంది. తాజాగా ఈ సినిమా నుంచి మేక‌ర్స్ ట్రైల‌ర్ విడుద‌ల చేశారు.
ట్రైల‌ర్ గమ‌నిస్తే.. ఇష్టంలేని బోరింగ్ జాబ్ చేస్తున్న కొంతమంది కుర్రాళ్లు.. ఆ జాబ్స్ మానేసి సొంత బిజినెస్ చేయాలి అనుకుంటారు. అయితే వారికి బిజినెస్ పెట్టాలి అనుకున్నప్పుడు ఎదురైనా సమస్యలు ఏంటి అనేది ఈ స్టోరీ. ఇక దేశంలోని అన్ని మధ్యతరగతి కుటుంబాలలో ఉన్న సమస్యను చెప్పాలనేదే ఈ చిత్రం వెనుక ఉన్న ఆలోచన అని ట్రైల‌ర్ చూస్తే అర్థ‌మ‌వుతుంది. ఇక ఈ సినిమా సెప్టెంబర్ 29 నుంచి ప్ర‌ముఖ ఓటీటీ ప్లాట్‌ఫామ్ డిస్నీ ప్లస్ హాట్‌స్టార్ వేదిక‌గా స్ట్రీమింగ్ కానుంది.
స్టార్ స్టూడియోస్ బ్యాన‌ర్‌పై రోనీ స్క్రూవాలా, సిద్ధార్థ్ రాయ్ కపూర్, అశ్వినీ అయ్యర్ తివారీ, నితేష్ తివారీ ఈ సినిమాను నిర్మించ‌గా.. అభిషేక్ సిన్హా దర్శకత్వం వహించారు. డైరెక్టర్‌ నితేష్ తివారీ ఈ సినిమాకు క‌థ, డైలాగ్స్ అందించాడు. అక్కినేని అమల, ఇష్వాక్ సింగ్‌తో పాటు మహిమా మక్వానా, గౌరవ్ పాండే, గురుప్రీత్ సైనీ, కరణ్ జోత్వాని, మేఘనా మాలిక్ త‌దిత‌రులు కీలక పాత్రలు పోషిస్తున్నారు.
