నందమూరి బాలకృష్ణ- బోయపాటి కాంబినేషన్‌లో ఓ సినిమా రూపొందుతున్న సంగతి తెలిసిందే. బోయపాటి స్టయిల్ లో భారీ యాక్షన్ ఎంటర్ టైనర్ గా రూపొందుతుంది. కాగా, లాక్‌డౌన్ కి ముందే.. ఈ చిత్రానికి సంబంధించి కొంత షూటింగ్ జరిగింది. ఇప్పుడు మళ్లీ షూటింగును ప్రారంభించడానికి ఏర్పాట్లు జరుగుతున్నాయి. అయితే, హీరో బాలకృష్ణ మాత్రం మరికొన్నాళ్లు పోయాకనే ఈ షూటింగులో జాయిన్ అవుతారని తెలుస్తోంది. గత నెలలో విడుదలైన ఈ చిత్రం టీజర్ కు అభిమానుల నుంచి మంచి స్పందన వచ్చింది. తమన్ సంగీతం అందిస్తున్నారు.
ఈ చిత్రంలో హీరోయిన్‌గా రాశిఖన్నా, కేథరిన్ వంటి పేర్లు నిన్నటి వరకు వినిపించినా వారెవరూ ఫైనల్ కాలేదు. కాగా తాజాగా అమలాపాల్ ఎంపికయ్యే అవకాశం ఉన్నట్లు తెలుస్తోంది. అక్కినేని నాగచైతన్య ‘బెజవాడ’ సినిమాతో టాలీవుడ్‌లో ఎంట్రీ ఇచ్చింది ఈ బ్యూటీ. ఆ తరువాత మెగా హీరోలు రామ్ చరణ్ తో ‘నాయక్’, అల్లు అర్జున్ ‘ఇద్దరమ్మాయిలతో’ చిత్రాలలో నటించి తక్కువ కాలంలోనే స్టార్ హీరోయిన్ గా గుర్తింపు తెచ్చుకుంది. ఇటీవలే ‘ఆమె’ చిత్రంలో బోల్డ్‌గా నటించి సంచలనం సృష్టించింది.
