తెలుగు బిగ్ బాస్ సీజన్ 2 గ్రాండ్ ఫినాలేకి ఇంక ఒక రోజూ మాత్రమే మిగిలి ఉంది. దీంతో ప్రేక్షకుల్లో ఆసక్తి నెలకొంది. నిన్న శుక్రవారం నాటి ఎపిసోడ్‌లో గతంలో ఎలిమినేట్ అయిన కంటెస్టెంట్స్ అందరూ తిరిగి బిగ్‌బాస్‌ హౌస్‌లోకి వచ్చి సందడి చేశారు. మొత్తం వైల్డ్ కార్డ్ ఎంట్రీలతో కలుపుకుని 18 మంది ఇంటి సభ్యులు ఉండగా.. నేటి ఎపిసోడ్‌లో 17 మంది కనిపించారు అయితే రెండు సార్లు బిగ్ బాస్ హౌస్‌కి వెళ్లి రెండు సార్లు నామినేట్ అయిన నూతన్ నాయుడు మాత్రం రాలేదు.
కాగా 18 మంది కంటెస్టెంట్స్‌తో ప్రారంభమైన ఈ బిగ్ బాస్ షో గ్రాండ్ ఫినాలేకి కేవలం ఐదుగురు సభ్యులు మాత్రమే మిగిలి ఉన్నారు. కౌశల్, సామ్రాట్, దీప్తి నల్లమోతు, గీతా మాధురి, తనీష్‌లు హౌస్‌లో ఉండగా మిగిలిన కంటెస్టెంట్స్ ఒక్కొక్కరుగా ఎలిమినేట్ అయ్యారు. అయితే వీరందరూ శుక్రవారం నాటి ఎపిసోడ్‌లో బిగ్ బాస్ హౌస్‌కు వచ్చి అందరినీ అలరించారు. నూతన్ నాయుడు మాత్రం హాజరుకాకపోవడంపై ఆసక్తిగా మారింది.
సామాన్యుడుగా హౌస్‌లోకి ఎంట్రీ ఇచ్చిన నూతన్ నాయుడు మూడో వారంలోని 15వ ఎపిసోడ్‌లో ఎలిమినేట్ అయ్యారు. అయితే ఎపిసోడ్ 50లో వైల్డ్ కార్డ్ ఎంట్రీ ద్వారా యాంకర్ శ్యామలతో కలిసి అడుగుపెట్టారు. రెండో సారి ఎంట్రీ ఇచ్చిన తరువాత కౌశల్‌తో సన్నిహితంగా ఉంటూ ఏకాకికి తోడుగా నిలిచారు. ఈ తరుణంలో 69 ఎపిసోడ్‌లో కెప్టెన్‌ టాస్క్‌లో భుజం గాయం కారణంగా హౌస్ నుండి బయటకు వచ్చారు. తిరిగి మళ్లీ బిగ్ బాస్ హౌస్‌కి వచ్చినా.. 85వ ఎపిసోడ్‌లో తిరిగి ఎలిమినేట్ అయ్యారు. ఈయన ఎలిమినేషన్‌పై అప్పట్లో పెద్ద చర్చ నడిచింది. కాగా 18 మంది ఇంటి సభ్యుల్లో 17 మంది కనిపించినా ఆయన మాత్రం హాజరుకాకపోవడానికి బలమైన కారణాలే ఉన్నట్టు తెలుస్తోంది. ఇక శనివారం నాటి ఎపిసోడ్ ప్రోమోను కూడా వదిలారు షో నిర్వాహకులు. అందులోనూ ఎక్కడా కనిపించడం లేదు నూతన్ నాయుడు.
కాగా తన ఎలిమినేషన్ ప్రజా తీర్పుకి అనుగుణంగా జరగనందున నిరాశకి గురయ్యాడని నూతన్ నాయుడు ఓపెన్ లెటర్ రాశారు. కోట్లాదిగా తనకు ఓట్లు వచ్చినా బిగ్ బాస్ పరిగణనలోనికి తీసుకోలేదని బిగ్ బాస్ కావాలనే ఇదంతా చేశారని, పక్షపాతంగా వ్యవహరించడం వల్లే ఇలా జరిగిందని తాను నమ్ముతున్నట్లు ఈ లేఖలో పేర్కొన్నారు. ఈ కారణంగానే నూతన్ నాయుడు ఫ్యామిలీ పార్టీకి హాజరుకాలేదని తెలుస్తోంది.
— Nutan Naidu (@NutanKNaidu) September 27, 2018
