మెగాస్టార్‌ చిరంజీవి హీరోగా కొరటాల డైరెక్షన్‌లో ‘ఆచార్య’ సినిమా రూపొందుతున్న సంగతి తెలిసిందే. ఇప్పటికే ఈ సినిమా కొంతవరకూ చిత్రీకరణను జరుపుకుంది. ఈ సినిమాలో ఓ స్పెషల్‌ రోల్‌లో రామ్‌ చరణ్ కనిపించనున్నాడు. హీరోలో స్ఫూర్తిని నింపే పాత్ర అని అంటున్నారు. దాంతో మెగా అభిమానులంతా ఈ ప్రాజెక్టుపై దృష్టిపెట్టారు.
ఇక తాజాగా పవన్ సినిమాలో కూడా రామ్‌ చరణ్ కనిపించనున్నాడనే వార్తలు వినిపిస్తున్నాయి. ప్రస్తుతం ‘వకీల్ సాబ్’ సినిమా చేస్తున్న పవన్ కల్యాణ్, ఆ తరువాత క్రిష్ దర్శకత్వంలో ఒక చారిత్రక చిత్రం చేయనున్నాడు. ఆంగ్లేయుల పాలనా కాలం నాటి వాతావరణంలో ఈ కథ నడుస్తుంది. ఈ సినిమాలో చరణ్ కూడా కనిపించే అవకాశం ఉందనే ఒక టాక్ ఫిల్మ్ నగర్లో బలంగా వినిపిస్తోంది. ఆయన పాత్ర ఎలా ఉండనుంది? ఆయన ఎలా కనిపించనున్నాడు? అనేది అంశాన్ని ఆసక్తికరంగా చర్చించుకుంటున్నారు ఫ్యాన్స్‌. ఇందులో వాస్తవమెంతన్నది చూడాలి మరి.
