వరుణ్‌ తేజ్‌ న్యూలుక్‌.. గుర్తుపట్టలేనంతగా మారిపోయాడు

మెగా ప్రిన్స్‌ వరుణ్ తేజ్ శైలి భిన్నంగా ఉంటుంది. ఈ ఆరడుగుల అందగాడు మొదటి నుంచి రొటోన్‌కు భిన్నంగా కథలను ఎంపిక చేసుకుంటున్నారు. అన్ని రకాల జోనర్లలో సినిమాలు చేస్తున్నారు. తాజాగా ఆయన హరీష్ శంకర్ దర్శకత్వంలో ‘వాల్మీకి’ అనే సినిమాను ప్రారంభించిన సంగతి తెలిసిందే. తమిళంలో కార్తీక్ సుబ్బరాజ్ తెరకెక్కించిన ‘జిగర్తాండ’కు ఇది రీమేక్. ఈ సినిమాలో వరుణ్‌ తేజ్ డాన్ పాత్రలో కనిపించనున్నారు.

ఈ సినిమాతో పాటు మరో చిత్రాన్ని కూడా వరుణ్ తేజ్ అంగీకరించారు. కిరణ్ కొర్రపాటి అనే కొత్త దర్శకుడితో ఒక స్పోర్ట్స్ డ్రామాలో వరుణ్ నటించనున్నారు. ఈ సినిమా కోసం ఇప్పుడు వరుణ్‌ తేజ్ సిద్ధమవుతున్నారు. ఈ సినిమాలో వరుణ్ ప్రొఫెషనల్ బాక్సర్ పాత్రలో నటిస్తున్నారు. తాను బాక్సర్‌గా మారడానికి గత కొన్ని రోజులుగా అమెరికాలోని లాస్ ఏంజెలెస్‌లో బాక్సింగ్‌లో శిక్షణ తీసుకుంటున్నారు. ఇంగ్లండ్‌కు చెందిన ప్రొఫెషనల్ బాక్సర్, సమ్మర్ ఒలింపిక్స్ మెడలిస్ట్ టోనీ జెఫ్రీస్ ఆధ్వర్యంలో గత రెండు నెలలుగా వరుణ్ శిక్షణ పొందుతున్నారు.

ఈ నేపథ్యంలో వరుణ్ తేజ్ తాజాగా ఇన్‌స్టాగ్రామ్‌లో పోస్ట్ చేసిన ఫొటో ఆసక్తికరంగా మారింది. ఈ ఫొటోలో టోనీ‌తో కలిసి ఉన్న వరుణ్ తేజ్ గుర్తుపట్టలేనంతగా మారిపోయారు. ఇటీవల ‘F2’ సినిమాలో చూసిన వరుణ్‌కు ఈ ఫొటోలో ఉన్న వరుణ్‌కు చాలా తేడా వచ్చేసింది. గుబురు గడ్డం, మీసాలు, గాగుల్స్, వెస్ట్రన్ స్టైల్ జాకెట్, షార్ట్స్‌తో అచ్చం ఇంగ్లిష్ మ్యాన్‌లా వరుణ్ తేజ్ కనిపిస్తున్నారు. ‘గత రెండు నెలలుగా ఈ వ్యక్తితో శిక్షణ అద్భుతంగా గడిచింది. టోనీ జెఫ్రీస్ నిన్ను మిస్ అవుతాను. త్వరలోనే మళ్లీ శిక్షణకు వస్తా!’ అని తన పోస్ట్‌లో వరుణ్ పేర్కొన్నారు.