దీపావళి పండుద సందర్భంగా అభిమానులకు శుభాకాంక్షలు తెలియజేస్తూ ఆయా సినిమాలకు సంబంధించిన కొత్త పోస్టర్లను, ఫస్ట్‌లుక్‌లను సోషల్‌మీడియా వేదికగా చిత్రబృందాలు విడులచేశాయి. మరి దీపావళికి వచ్చిన పోస్టర్లపై ఓ కన్నేయండి..
‘సరిలేరు నీకెవ్వరు’
మహేశ్‌బాబు ‘మేజర్‌ అజయ్‌కృష్ణ’ పాత్రలో నటిస్తున్న చిత్రం ‘సరిలేరు నీకెవ్వరు’. అనిల్‌ రావిపూడి దర్శకత్వం వహిస్తున్న ఈ సినిమాలో రష్మిక మందన హీరోయిన్‌. ఈ చిత్రంలో విజయశాంతి కీలకపాత్ర పోషిస్తున్నారు. ఇప్పటికే మహేష్‌బాబు, విజయశాంతి లుక్‌లను విడుదల చేసిన మూవీ యూనిట్‌ ఆదివారం దీపావళి సందర్భంగా రష్మిక పాత్రకు సంబంధించిన ఓ పోస్టర్‌ను విడుదల చేసింది. దీనిలో రష్మిక పెళ్లిచూపులకు కూర్చున్నట్లు కనిపిస్తుంది. మరోవైపు మహేష్‌ నవ్వుతూ చాలా కూల్‌గా కనిపించారు. ఈ చిత్రం వచ్చేఏడాది జనవరి 12న ప్రేక్షకుల ముందుకు రానుంది.
‘అల వైకుంఠపురములో..’
అల్లు అర్జున్‌ హీరోగా తెరకెక్కుతున్న చిత్రం ‘అల.. వైకుంఠపురములో..’. మాటల మాంత్రికుడు త్రివిక్రమ్‌ దర్శకత్వం వహిస్తున్న ఈ చిత్రంలో పూజాహెగ్డే హీరోయిన్‌. దీపావళి సందర్భంగా ఇప్పటికే ఈ సినిమాలోని ‘రాములో.. రాములా..’ అనే పాటను విడుదల చేసిన చిత్రబృందం ఆదివారం కొత్తపోస్టర్‌తో అభిమానులను పలకరించింది. సినిమాలో కీలకపాత్రలు పోషించిన వారందరితో ఈ పోస్టర్‌ ఉంది. జనవరి 12న ఈ సినిమా ప్రేక్షకుల ముందుకు రానుంది.
‘డిస్కోరాజా’
రవితేజ నటిస్తున్న చిత్రం ‘డిస్కోరాజా’. నభా నటేష్‌, పాయల్‌ రాజ్‌పుత్‌ కథానాయికలు. ఈ చిత్రానికి వి.ఐ.ఆనంద్‌ దర్శకత్వం వహిస్తున్నారు. పండగ శుభాకాంక్షలు తెలియచేస్తూ.. ఈ సినిమా కొత్త పోస్టర్‌ను చిత్రబృందం విడుదల చేసింది. ఈ పోస్టర్‌లో రవితేజ, నభానటేష్‌ జంటగా కనిపించారు.
‘భీష్మ’..
నితిన్‌ హీరోగా నటిస్తున్న చిత్రం ‘భీష్మ’. రష్మిక హీరోయిన్‌గా ఈ సినిమా నుంచి దీపావళి పండుగ సందర్భంగా.. ఫస్ట్‌లుక్‌ పోస్టర్లను చిత్రబృందం విడుదల చేసింది. ఇందులోని ఓ పోస్టర్‌లో రౌడీలతో ఫైట్‌ చేస్తున్నట్లు ఉన్న నితిన్‌.. మరో పోస్టర్‌లో రష్మిక అందానికి ముగ్ధుడైనట్లు కనిపించారు. ఈ చిత్రానికి వెంకీ కుడుముల దర్శకత్వం వహిస్తున్నారు.
‘సూపర్‌ మచ్చి’
మెగాస్టార్‌ చిరంజీవి చిన్నల్లుడు కళ్యాణ్‌దేవ్‌ హీరోగా తెరకెక్కుతున్న సినిమా ‘సూపర్‌మచ్చి’. పులివాసు దర్శకత్వం వహిస్తున్న ఈచిత్రంలో రియా చక్రవర్తి హీరోయిన్‌. శనివారం టైటిల్‌ పోస్టర్‌ను విడుదల చేసిన చిత్రబృందం.. ఆదివారం కళ్యాణ్‌దేవ్‌-రియా జంటగా ఉన్న మరో రెండు పోస్టర్లను విడుదల చేసింది.
