మంచు విష్ణు డ్రీమ్ ప్రాజెక్ట్‌ ‘కన్నప్ప’. పాన్ ఇండియా స్థాయిలో తెరకెక్కిస్తున్న ఈ సినిమా ఇటీవల న్యూజిలాండ్‌‌లో లాంగ్ షెడ్యూల్ షూటింగ్ పూర్తి చేసుకుని ఇండియాకు తిరిగి వచ్చింది. ఈ సినిమాలో మోహన్ లాల్, ప్రభాస్, మోహన్ బాబు వంటి హేమాహేమీలు నటిస్తున్నారని ప్రకటించారు. ఇక ఇప్పుడు మంచు వారి నుంచి మూడో తరం కూడా ఈ కన్నప్ప సినిమాలో నటిస్తున్న విషయం వెల్లడైంది.
మోహన్ బాబు వారసుడిగా మంచు విష్ణు రాగా.. మంచు విష్ణు వారసత్వంగా అవ్రామ్ మంచు కన్నప్పతో ఎంట్రీ ఇవ్వనున్నాడు. మంచు విష్ణు తన ఐదేళ్ల కొడుకు అవ్రామ్ సినిమా రంగ ప్రవేశాన్ని అద్భుతమైన దృశ్యకావ్యమైన ‘కన్నప్ప’తో మొదలుపెట్టారు. లెజెండరీ నటుడు మోహన్ బాబు నుంచి మొదలుకొని ఈ చిత్రంలో మూడు తరాలకు చెందిన మంచు కుటుంబ సభ్యులు నటిస్తున్నట్టు అయింది.
అవ్రామ్ పాత్రకు కన్నప్పలో ఎంతో ప్రాధాన్యత ఉన్నట్లు తెలుస్తోంది. తన కొడుకు ఇలా సినీ ఎంట్రీ ఇస్తుండటంపై మంచు విష్ణు స్పందించారు. “ఈ ‘కన్నప్ప’ సినిమాకు నా జీవితంలో ఎంతో ప్రాధాన్యం ఉంది. నా కొడుకు అవ్రామ్ ఈ సినిమాలో కీలక పాత్రలో నటించడం చాలా గర్వకారణం. ఇది కేవలం ఒక చిత్రం మాత్రమే కాదు. ఇది మా కుటుంబం యొక్క మూడు తరాల కలయికతో వస్తోన్న అరుదైన చిత్రం” అంటూ చెప్పుకొచ్చారు.
కన్నప్ప మొదటి షెడ్యూల్ ముగియగానే మంచు విష్ణు తనకు సహకరించిన టీంకు థాంక్స్ చెప్పారు. ఇప్పుడు తన కొడుకు ఎంట్రీపై స్పందించారు. “అవ్రామ్‌తో కలిసి ఈ సినిమా ప్రయాణాన్ని ప్రారంభిస్తున్నాను. సినీ ప్రేమికులందరి ఆశీర్వాదం కోరుకుంటున్నాను. ‘కన్నప్ప’ ప్రతి ఒక్కరికీ ఒక చిరస్మరణీయ అనుభూతిని కలిగిస్తుంది. ఇది మా కుటుంబంలో కొత్త అధ్యాయానికి నాంది పలుకుతుంది” అని పేర్కొన్నారు. ‘మహాభారత్’ ఫేమ్ ముఖేశ్ కుమార్ సింగ్ డైరెక్షన్‌లో తెరకెక్కుతున్న ఈ సినిమాపై భారీ అంచనాలు ఉన్నాయి.
