పాకిస్థాన్‌లో ఘోర విమాన ప్రమాదం జరిగింది. పాకిస్తాన్‌ ఎయిర్‌లైన్స్‌కు చెందిన విమానం కరాచీలోని జిన్నా ఇంటర్నేషనల్ ఎయిర్‌పోర్టుకు సమీపంలో కుప్పకూలింది. కొద్దిసేపటిలో ల్యాండ్ అవుతుందనగా ఈ దుర్ఘటన జరిగింది. జనావాసాల మధ్య విమానం కూలిపోవడంతో నష్టం భారీగా ఉంటుందని, మృతుల సంఖ్య పెరిగే ప్రమాదం ఉందని భావిస్తున్నారు. ఇప్పటికే విమానంలో 90 మంది ప్రయాణికులు, 8 మంది సిబ్బంది ఉన్నారు. మొత్తంగా 107 మంది చనిపోయారని సమాచారం. ఇప్పటివరకు 37 మృతదేహాలను వెలికితీసినట్లు సింధ్ ఆరోగ్య మంత్రి అజ్రా పెచుహో వెల్లడించారు.
విమానంలోని 2 ఇంజిన్లు పనిచేయకపోవడంతో ఓ ఇంజిన్‌లో మంటలు చేలరేగినట్టు ప్రత్యక్ష సాక్షులు తెలిపినట్లు స్థానిక మీడియాలో కథనాలు వెలువడ్డాయి. పాకిస్థాన్‌ ఎయిర్‌లైన్స్‌కు చెందిన ఏ-320 విమానం లాహోర్‌ నుంచి కరాచీకి వెళ్తుండగా ఈ ప్రమాదం జరిగింది. విమాన ప్రమాదంపై పాక్ ప్రధాని ఇమ్రాన్‌ ఖాన్‌ తీవ్ర దిగ్భ్రాంతి వ్యక్తంచేశారు. ప్రమాద ఘటనపై దర్యాప్తుకు ఆదేశించినట్టు ట్విటర్‌లో పేర్కొన్నారు. భారత ప్రధాని నరేంద్ర మోడీ కూడా పాక్ విమాన ప్రమాదంపై సంతాపాన్ని వ్యక్తంచేస్తూ ట్వీట్ చేశారు.
