మెగాస్టార్ చిరంజీవి హీరోగా నటించిన చిత్రం ‘భోళా శంకర్’. ఈ సినిమాలో తమన్నా హీరోయిన్గా నటించగా.. కీర్తి సురేశ్ చిరంజీవి చెల్లిగా నటించింది. ఈ సినిమా భారీ అంచనాల మధ్య నిన్న ప్రేక్షకుల ముందుకు వచ్చింది. ఏకే ఎంటర్టయిన్ మెంట్స్ బ్యానర్ పై మెహర్ రమేశ్ దర్శకత్వంలో వచ్చిన ఈ చిత్రం తొలి రోజు మిశ్రమ స్పందన అందుకుంది. ఇక, ఓపెనింగ్ డే వసూళ్లపై చిత్ర నిర్మాణ సంస్థ సోషల్ మీడియాలో స్పందించింది.
భోళా శంకర్ చిత్రం బాక్సాఫీసు వద్ద అదిరిపోయే ఆరంభాన్ని అందుకుందని ఏకే ఎంటర్టయిన్ మెంట్స్ వెల్లడించింది. భోళా శంకర్ ప్రపంచవ్యాప్తంగా తొలి రోజున రూ.33 కోట్ల గ్రాస్ వసూలు చేసినట్టు తెలిపింది. కాగా, ఇవాళ రెండో శనివారం, రేపు ఆదివారం వరుస సెలవులు కావడంతో, మెగా మూవీకి వసూళ్లు మరింత పెరిగే అవకాశాలున్నట్టు ట్రేడ్ వర్గాలు అంచనా వేస్తున్నాయి.
