టాలీవుడ్ హీరో దగ్గుబాటి వెంకటేష్ ప్రధాన పాత్రలో నటించిన తాజా చిత్రం ‘నారప్ప’. కరోనా కారణంగా ఏర్పడిన పరిస్థితుల రీత్యా.. ఎన్నో రోజుల సంగ్ధిదత తర్వాత ‘నారప్ప’ చిత్రాన్ని అమెజాన్ ప్రైమ్లో రిలీజ్ కానున్నట్లు చిత్రబృందం ప్రకటించిన సంగతి తెలిసందే. ఈ నేపథ్యంలో బుధవారం ‘నారప్ప’ ట్రైలర్ను సోషల్ మీడియా వేదిక విడుదల చేసింది. భూమి కోసం పోరాటం చేసే వ్యక్తిగా వెంకటేశ్ నటన ప్రతిఒక్కరితో చప్పట్లు కొట్టించేలా ఉంది. ఆయన చెప్పిన డైలాగులు ఈలలు వేయించేలా ఉన్నాయి.
తమిళంలో సూపర్హిట్ అందుకున్న ‘అసురన్’ చిత్రానికి రీమేక్గా ఈ సినిమా తెరకెక్కింది. కుల వ్యవస్థ, భూవివాదం వంటి సామాజిక అంశాలతో ఈ సినిమా రూపుదిద్దుకుంది. ధనుష్ నటించిన ‘అసురన్’ ప్రేక్షకులు, ప్రముఖుల నుంచే కాకుండా విమర్శకుల నుంచీ ప్రశంసలు అందుకుంది. కాగా, తెలుగు నేటివిటీకి తగిన విధంగా ‘అసురన్’లో కొన్ని మార్పులు చేసి ‘నారప్ప’ తెరకెక్కించారు. శ్రీకాంత్ అడ్డాల దర్శకత్వం వహించిన ఈ సినిమాలో వెంకటేశ్ జంటగా ప్రియమణి కనిపించనున్నారు. ప్రకాశ్రాజ్, మురళీశర్మ, కార్తిక్ రత్నం కీలకపాత్రలు పోషించారు. మణిశర్మ స్వరాలు అందించారు. సురేశ్ ప్రొడెక్షన్స్ పతాకంపై సురేశ్ బాబు ఈ చిత్రాన్ని నిర్మించారు. జులై 20న ఈ సినిమా అమెజాన్ ప్రైమ్లో విడుదల కానుంది.
