వచ్చే ఏడాది ‘సారే జహాసే అచ్ఛా’

అంతరిక్షంలో అడుగుపెట్టిన తొలి భారతీయుడిగా చరిత్ర సృష్టించిన రాకేష్‌ శర్మ బయోపిక్‌ నిర్మాణానికి సన్నాహాలు జరుగుతున్నట్లు కొన్ని రోజులుగా వార్తలు వస్తున్నాయి. షారుక్‌ ఖాన్‌ ఇందులో రాకేష్‌ పాత్ర పోషించనున్నట్లు చెప్పుకొచ్చారు. మహేష్‌ మత్తె ఈ చిత్రానికి దర్శకత్వం వహించనున్నారని, భూమి పడ్నేకర్‌ కథానాయికగా నటించనున్నట్లు కూడా రాశారు. త్వరలోనే దీనికి సంబంధించిన అధికారిక ప్రకటన రాబోతోందని చిత్ర వర్గాలు పేర్కొన్నాయి.

అయితే ఈ బయోపిక్‌పై నిర్మాత రోనీ స్క్రూవాలా శనివారం స్పష్టత ఇచ్చారు. సినిమాను తెరకెక్కించబోతున్న విషయం నిజమే అన్నారు. ‘ఈ సినిమాను షారుక్‌ ఖాన్‌తో తీయబోతున్నాం. వచ్చే ఏడాది ఫిబ్రవరి లేదా మార్చిలో సినిమాను ప్రారంభిస్తాం. కానీ కథానాయికను ఇంకా నిర్ణయించలేదు. ఈ ప్రాజెక్టు విషయంలో చాలా ఉత్సుకతగా ఉన్నాను’ అని ఆయన అన్నారు. తొలుత ఈ బయోపిక్‌లో ఆమిర్ ఖాన్‌ నటించే అవకాశాలు ఉన్నాయని వార్తలు వచ్చాయి. కానీ అందులో నిజం లేదని తెలిసింది. ఈ సినిమాకు ‘సారే జహాసే అచ్ఛా’ అనే టైటిల్‌ను ఖరారు చేసినట్లు సమాచారం.

షారుక్‌ ప్రస్తుతం ‘జీరో’ సినిమాలో నటిస్తున్నారు. ఇందులో ఆయన మరుగుజ్జుగా కనిపించనున్నారు. ఆనంద్‌ ఎల్‌ రాయ్‌ దర్శకత్వంలో తెరకెక్కుతోన్న ఈ చిత్రంలో అనుష్కశర్మ ప్రధాన పాత్ర పోషిస్తున్నారు. ఇందులో ఓ సూపర్‌స్టార్‌గా కత్రినా కైఫ్‌ నటిస్తున్నారు. డిసెంబరు 21న చిత్రాన్ని విడుదల చేసేందుకు సన్నాహాలు చేస్తున్నారు.