యంగ్ హీరో సుధీర్ బాబు హీరోగా గత నెలలో ‘సమ్మోహనం’ చిత్రంతో ప్రేక్షకుల ముందుకు వచ్చి మంచి విజయాన్ని తన ఖాతాలో వేసుకున్నాడు. ఈ సినిమా సెట్స్ లో ఉండగానే సుధీర్ బాబు చేసిన మరో సినిమా ‘నన్ను దోచుకుందువటే’. ఈ చిత్రాన్ని సుధీర్ బాబు తన సొంత బ్యానర్ సుధీర్ బాబు ప్రొడక్షన్స్ పై నిర్మించారు. నూతన దర్శకుడు ఆర్ ఎస్ నాయుడు దర్శకత్వంలో తెరకెక్కిన ఈ సినిమా రొమాంటిక్ ఎంటర్ టైనర్ గా ఉండనుంది. నాబా నటేష్ హీరోయిన్ గా నటించింది.
ఈ మూవీ ఇప్పటికే షూటింగ్ మొత్తం పూర్తి చేసుకోవడంతో ప్రస్తుతం పోస్ట్ ప్రొడక్షన్ పనుల్లో బిజీగా ఉంది. ఇక ఈ సినిమాను వినాయక చవితి కానుకగా సెప్టెంబర్ 13న రిలీజ్ చేయనున్నట్లు ఇవాళే చిత్రబృందం ప్రకటించింది. తాజాగా అందుకు సంబంధించిన పోస్టర్ ను రిలీజ్ చేశారు. ఈ చిత్రంలో సుధీర్ బాబు ఆటిట్యూడ్ కలిగిన మేనేజర్ గా కనిపిస్తున్నాడు. ఇటీవలే విడుదల చేసిన టీజర్ లో యువతకు నచ్చే అంశాలతో పాటు కొత్త దనం ఉండటంతో మంచి రెస్పాన్స్ ను సొంతం చేసుకుంది. త్వరలోనే ఈ సినిమా పాటలను విడుదల చేయనున్నారు.
