Saif Ali Khan attack:
ముంబైలో బాలీవుడ్ నటుడు సైఫ్ అలీ ఖాన్ పై దాడి జరిగింది. గురువారం తెల్లవారుజామున 2:30 గంటల సమయంలో బాంద్రా వెస్ట్ లోని సైఫ్ ఇంట్లోకి ఓ దొంగ చొరబడి, కత్తితో దాడి చేశాడు. ఆ దాడిలో సైఫ్ కు ఆరు కత్తిపోట్లు పడ్డాయి. గాయాలపాలైన సైఫ్‌ను వెంటనే లీలావతి ఆసుపత్రికి తరలించారు, అక్కడ సర్జరీ జరిగింది.
ఈ కేసు విచారణను ముంబై పోలీస్ క్రైమ్ బ్రాంచ్‌లో పేరుగాంచిన ‘ఎన్‌కౌంటర్ స్పెషలిస్ట్’ దయా నాయక్ నేతృత్వంలో కొనసాగిస్తున్నారు. దయా నాయక్ 1995లో ముంబై పోలీస్ విభాగంలో ట్రైనీగా చేరారు. 1996లో జుహూ పోలీస్ స్టేషన్‌లో పని చేయడం ప్రారంభించిన ఆయన, తన కెరీర్‌లో 80కి పైగా నేరస్థులను ఎన్‌కౌంటర్ చేసిన ఘనత సాధించారు. ముంబై అండర్‌వరల్డ్ గ్యాంగ్‌లను వేటాడి ఎన్నో నేరజాలాలను దెబ్బతీశారు. ప్రస్తుతం ఆయన ముంబై క్రైమ్ బ్రాంచ్‌లో పనిచేస్తున్నారు.
సైఫ్, కరీనా కపూర్ ఖాన్ కుటుంబం ఒక ప్రకటన విడుదల చేసింది: “మా ఇంట్లో దొంగతనం ప్రయత్నం జరిగింది. సైఫ్ గాయపడగా, చికిత్స పొందుతున్నారు. ఇది పోలీస్ వ్యవహారం. దయచేసి అభిమానులు సహనంతో ఉండండి. పరిస్థితిపై మేము అప్‌డేట్స్ ఇస్తాం,” అని వివరించారు.
శివసేన (యుబీటీ) ప్రతినిధి ప్రియాంక చతుర్వేది ఈ ఘటనపై స్పందిస్తూ, “ముంబైలో మరో హై ప్రొఫైల్ దాడి జరిగిందంటే ఎంత విచారకరం. ఈ ఘటన ముంబై పోలీసుల పనితీరు, హోం మినిస్టర్ పై ప్రశ్నలు లేవనెత్తుతోంది,” అని ట్విట్టర్ ద్వారా వ్యాఖ్యానించారు.
సైఫ్ అలీ ఖాన్ పై దాడి ముంబై నగర భద్రతపై ప్రశ్నల్ని లేవనెత్తింది. పోలీసుల దర్యాప్తు వేగంగా సాగుతోంది. ఈ కేసులో దయా నాయక్ వంటి అనుభవజ్ఞుడు ఉండడంతో నిందితుడు త్వరలోనే పట్టుబడతాడని ఫ్యాన్స్ భావిస్తున్నారు.
