మెగాస్టార్‌ చిరంజీవి ఇంట్లో టాలీవుడ్‌ ప్రముఖులు ఆదివారం భేటీ అయ్యారు. ఇండస్ట్రీలో నెలకొన్న సమస్యలపై పరిశ్రమ పెద్దలతో చర్చించేందుకు ఆంధ్రప్రదేశ్‌ ముఖ్యమంత్రి జగన్‌మోహన్‌రెడ్డి ఇటీవల సుముఖత వ్యక్తం చేశారు. అతి త్వరలోనే ఈ సమావేశం జరిగే అవకాశం ఉంది. ఈ నేపథ్యంలో సీఎం తో ఏం మాట్లాడాలి, ఏ అంశాలు ప్రస్తావించాలి అనే విషయంపై చర్చించినట్లు తెలుస్తోంది. సోమవారం జరిగిన ఈ భేటీలో చిరంజీవి, నాగార్జున, అల్లు అరవింద్‌, సురేశ్‌బాబు, దిల్‌రాజు, వి.వి.వినాయక్‌, కొరటాల శివ, మెహర్‌ రమేశ్‌, ఆర్‌.నారాయణమూర్తితో పాటు పలువురు సినిమా ప్రముఖులు పాల్గొన్నారు. ఆంధ్రప్రదేశ్‌లో ఇటీవల వచ్చిన కొత్త జీవో విషయంలో దర్శకనిర్మాతలు విముఖత వ్యక్తం చేస్తున్న విషయం తెలిసిందే. ఆ జీవో అమలును పునరాలోచించడంతో పాటు టికెట్‌ ధరలు, ఇతర సమస్యలను భేటీ సందర్భంగా సీఎం జగన్‌కు వివరించనున్నారు. కరోనా వల్ల తీవ్ర నష్టాల్లో కూరుకుపోయిన ఇండస్ట్రీని ఆదుకోవాలని కోరడంతో పాటు రాయితీలు కల్పించాలని కోరే అవకాశం ఉంది.
