బాలీవుడ్ ఫైర్‌ బ్రాండ్‌ కంగనా రనౌత్‌ ప్రధాన పాత్రలో రూపొందుతోన్న చిత్రం ‘తలైవి’. దివంగత నటి, తమిళనాడు మాజీ ముఖ్యమంత్రి జయలలిత బయోపిక్‌. పాన్‌ ఇండియా స్థాయిలో డైరెక్టర్‌ ఎ.ఎల్‌. విజయ్‌ తెరకెక్కిస్తున్నారు. ఈ సినిమా త్వరలో విడుదల కానుంది. ఈ నేపథ్యంలో కొన్ని స్టిల్స్‌ని విడుదల చేసింది చిత్ర బృందం. ఈ సినిమాలో అప్పటి ప్రధాని ఇందిరాగాంధీ, తమిళనాడు మాజీ ముఖ్యమంత్రి ఎంజీ రామచంద్రన్‌ని (ఎంజీఆర్‌) జయలలిత కలిసిన సన్నివేశాలున్నాయి. వాటికి సంబంధించిన ఫొటోలే ఇవి. వాటితోపాటు మరో రెండు విభిన్న అవతారాల్లో దర్శనమిచ్చింది కంగనా.
ఇవి ఈ సినిమాపై అంచాలు పెంచాశాయి. ప్రస్తుతం ఈ ఫొటోలు సోషల్‌ మీడియాలో వైరల్‌ అవుతున్నాయి. ఎంజీఆర్‌ పాత్రని అరవింద స్వామి పోషించారు. ప్రకాష్‌రాజ్‌, పూర్ణ, మధుబాల తదితరులు కీలక పాత్రల్లో కనిపించనున్నారు. విష్ణు ఇందూరి, శైలేష్‌ ఆర్‌ సింగ్‌, బ్రిందా ప్రసాద్‌ సంయుక్తంగా నిర్మించారు. వేసవిలో విడుదల కావాల్సిన ఈ సినిమా కరోనా కారణంగా వాయిదా పడింది. ఇప్పుడు పరిస్థితులు కుదుటపడటంతో ప్రేక్షకుల ముందుకు తీసుకొచ్చేందుకు సన్నాహాలు చేస్తున్నారు దర్శకనిర్మాతలు.
